Aram Ngena Ngepan Iban Lebuh Ngerami ka Majlis Melah Pinang

Aram ngena ngepan Iban lebuh ngerami ka majlis melah pinang...

(English translation: Let's wear traditional Iban costume for weddings)

Meri tabi basa ngagai bala pembaca blog aku. Terima kasih laban kita deka macha blog aku. Diatu aku ka mantai ka post aku pasal pengawa makai selamat kami udah ditikah ba St. Thomas Cathedral, Kuching. Meri terima kasih mega ba kaban belayan ke datai ngagai gerija enggau ke ba Fourpoints Sheraton Hotel, Kuching ari nya.

Kami duai meri besai terima kasih mega ngagai apai indai, entua, menyadi, ipar enggau kaban ke meri tulung enggau sukung maya ngadu ka pengawa kami duai ari nya. Jasa sida ya Tuhan aja ke ulih balas. Ngarap ka semua sida ya diberi mujur pendiau enggau bahagia selama-lama ya.

Laban penyiru kami duai enggau adat bansa Iban nya alai kami duai ngena ngepan Iban lebuh kami duai ngadu ke pengawa makai selamat kami ba Fourpoints Sheraton Hotel Kuching, 28 April 2012 arinya. Gaga ati kami duai nyadi "Raja Sehari" tauka enti kitai Iban "Keling enggau Kumang".

Maia kami tama ngagai Rainforest Ballroom pejalai kami lalu dibai enggau tabuh "Gendang Pempat" ari Selepong, Sri Aman. Pengawa kami ngena ngepan semina ngagai "toasting" udah nya kami alu betukar ngena baju lain. 

Maioh bala gaga ati meda laban jarang urang ba negeri ka ngena ngepan Iban maia pengawa "wedding reception dinner" lebih gi ke ba hotel di negeri. Kami enda malu (mina ngenan ke penyelap diri ngena ngepan tu) ngena ngepan Iban taja pan bisi persepsi urang engka madah ngena ngepan Iban tu "old fashion".

Pengawa kami enda ngena adat Iban ke penuh ya laban peringkat adat udah diadu maia kami duai bertunang suba, 2 September 2011. Malam nya semina kami ka muka mata urang kelebih gi sida ke nadai kala meda ngepan Iban lama, nya alai kami duai begari ngepan. 

Taja pan nda lama ngena ngepan tang kami chukup gaga ati laban ulih mantai ka pemanah ngepan Iban ngagai bala penatai lebih agi sida ke ari Semenanjung enggau bala sida Jipun ke nadai kala meda ngepan Iban kitai kelia.

Nya alai aku ngari ke anak Iban ke generasi baru aram kitai ngena ngepan Iban lebuh pengawa baka tu. Anang takut enti urang madah kitai tu "old fashion" laban "old fashion" kitai tu nyadi kebanggaan kitai Iban, nya ya Ngepan Iban kitai.  

Suah aku bepanggai ka jaku tu: "Dikelala bungai ari kayu, dikelala buah ari langgu, dikelala bansa ari jaku, dikelala adat ari penyiru, dikelala kaban ari ngepan."

Ba post aku ditu aku mantai ka sekeda gambar kami malam nya. Bala pembaca blog aku tau ga "click" ba link tu enti ka meda gambar "pre-wedding" photos kami ke ngena ngepan Iban diambi ba Sarawak Cultural Village, Kuching. Gambar kami duai tu diambi photographer kami Andy Phe.Gambar Pre-Wedding kami duai Johnney & Veeky

Lebuh tama ke Rainforest Ballroom

 

Disclaimer: Minta ampun enti tulis Iban aku ditu enda entu betul laban aku enda kala belajar nulis Bahasa Iban maia aku sekula suba. Naka tu meh ulih ditulis aku ba post tu.

Terima kasih semua.